សាលារាជធានីភ្នំពេញ ប្រាប់មហាជន ឲ្យសរសេរសំបុត្រប្តឹងចំពោះសមត្ថកិច្ចឡានទឹកណា ទារប្រាក់ក្នុងពេលពន្លត់ភ្លើងឆេះផ្ទះ
2 ខែសីហា 2012 បញ្ចេញមតិ
(ថ្ងៃទី 2 សីហា 2012, ម៉ោង 08:31:AM) | ដោយ: សុខ ភក្តី
ភ្នំពេញ: សាលារាជធានីភ្នំពេញ បានចេញសេចក្តីប្រកាសព័ត៌មាន ដោយអំពាវនាវដល់មហាជន ត្រូវសរសេរលិខិតជាលាយលក្ខណ៍អក្សរ បែបអនាមិក ប្តឹងសមត្ថកិច្ចឡានទឹកណាដែលបានទារប្រាក់ក្នុងពេលពន្លត់ភ្លើងឆេះផ្ទះ។ សេចក្តីប្រកាសដូច្នេះ ដោយសារតែមានការលើកឡើងថា ពេលភ្លើងឆេះផ្ទះប្រជាពលរដ្ឋនៅសង្កាត់ទួលសង្កែ ខណ្ឌឫស្សីកែវ កាលពីថ្ងៃទី២៣កក្កដា ឆ្នាំ២០១២ សមត្ថកិច្ចឡានទឹក បានទារលុយពីប្រជាពលរដ្ឋម្ចាស់ផ្ទះ មុននឹងទាញទុយោបាញ់ទឹកពន្លត់ភ្លើង។
ក្នុងសេចក្តីប្រកាសព័ត៌មាន ចុះថ្ងៃទី៣១ ខែកក្កដា ឆ្នាំ២០១២ សាលារាជធានីភ្នំពេញ បានប្រកាសថា “ដើម្បីជាមធ្យោបាយក្នុងការអភិវឌ្ឍនិងលើកទឹកចិត្តដល់សមត្ថកិច្ច ក្នុងពេលបំពេញការងារ គួរតែប្រជាពលរដ្ឋដែលបានស្ថិតក្នុងហេតុការណ៍ ហើយឃើញសមត្ថកិច្ចណាទារប្រាក់ពីប្រជាពលរដ្ឋ ត្រូវសរសេរជាលាយលក្ខណ៍អក្សរបែបអនាមិក ផ្តល់ជូនមកសាលារាជធានីភ្នំពេញអំពីឈ្មោះ និងលេខរថយន្តរបស់បុគ្គលិកខិលខូចនោះ ដើម្បីចាត់វិធានការ និងដាក់ពិន័យចំពោះជនដែលធ្វើឲ្យប៉ះពាល់ដល់កិត្តិយសរបស់សមត្ថកិច្ច”។
សេចក្តីប្រកាសរបស់សាលារាជធានីភ្នំពេញ ក៏បានបង្ហាញថា កាលពីថ្ងៃទី២៣ ខែកក្កដា ឆ្នាំ២០១២ វេលាម៉ោង ១៤ និង ៣០ នាទី មានអគ្គិភ័យកើតឡើងនៅសង្កាត់ទួលសង្កែ ខណ្ឌឫស្សីកែវ។ ក្នុងហេតុការណ៍នោះ សមត្ថកិច្ចការិយាល័យនគរបាលបង្ការនិងពន្លត់អគ្គិភ័យ នៃស្នងការដ្ឋាននគរបាលរាជធានីភ្នំពេញ បានខិតខំអស់ពីសមត្ថភាព ជួយទប់ស្កាត់កុំឲ្យឆេះរីករាលដាល និងពន្លត់អគ្គិភ័យដែលកំពុងឆាបឆេះ ព្រមទាំងបានខិតខំធ្វើការអំពាវនាវទៅអង្គភាពដែលមានរថយន្តពន្លត់អគ្គិភ័យ ឲ្យបានចូលរួមជួយអន្តរាគមន៍ទាន់ពេលវេលា ដូចជារថយន្តពន្លត់អគ្គិភ័យរបស់ព្រលានយន្តហោះអន្តរជាតិភ្នំពេញ រថយន្តពន្លត់អគ្គិភ័យរបស់បញ្ជាការដ្ឋានជាតិកម្លាំងពិសេសប្រឆាំងភេវរកម្ម រថយន្តពន្លត់អគ្គិភ័យរបស់បញ្ជាការដ្ឋានកងរាជអាវុធហត្ថរាជធានីភ្នំពេញ រថយន្តពន្លត់អគ្គិភ័យរបស់ក្រសួងមហាផ្ទៃ និងរថយន្តពន្លត់អគ្គិភ័យរបស់ខេត្តកណ្តាល។
សេចក្តីប្រកាសបានបញ្ជាក់ថា “បើគ្មានការខិតខំបែបនេះទេ ប្រហែលអគ្គិភ័យ មិនត្រូវបញ្ចប់ពីរម៉ោងបន្ទាប់ ហើយភាពអន្តរាយផ្ទះសម្បែងនិងទ្រព្យសម្បត្តិមិនមែនមានទំហំប៉ុននេះទេ។ ផ្ទុយទៅវិញ ការខិតខំរបស់សមត្ថកិច្ចត្រូវបានជនអគតិមួយចំនួន ចោទប្រកាន់ថា សមត្ថកិច្ចមិនបានបំពេញភារកិច្ចរបស់ខ្លួន បែរជាទារប្រាក់ ដោយមិនបាញ់ទឹកពន្លត់អគ្គិភ័យទេ និងបានបាញ់ទឹកតែផ្ទះណាឲ្យលុយប៉ុណ្ណោះ”។
ការចោទប្រកាន់បែបនេះ ត្រូវបានសាលារាជធានីភ្នំពេញ លើកឡើងថា ជាការចោទប្រកាន់គ្មានមូលដ្ឋាន ដែលពុំមានចេតនាល្អក្នុងការរិះរកភាពរីកចម្រើនឡើយ តែបែរជាធ្វើឲ្យសមត្ថកិច្ចបាក់ទឹកចិត្តក្នុងការបំពេញការងារ ព្រោះថា នៅពេលបាញ់ទឹក គឺត្រូវសិក្សាពីលក្ខណៈបច្ចេកទេសឲ្យបានគ្រប់គ្រាន់ ដើម្បីឲ្យទឹកដែលបាញ់ចេញចំគោលដៅ និងមានប្រសិទ្ធភាព។ ជាក់ស្តែងក្នុងការជួយសង្គ្រោះ កងកម្លាំងសមត្ថកិច្ច នៃកងរាជអាវុធហត្ថខណ្ឌឫស្សីកែវម្នាក់ បានរងរបួសធ្ងន់ ដែលបច្ចុប្បន្នកំពុងសម្រាកព្យាបាលនៅក្រៅប្រទេស៕
អំពីម្ចាស់ប្លក កំណត់ត្រាសិលា
‹‹កំណត់ត្រាសិលា›› បង្កើតឡើងក្នុង គោល បំណង ដើម្បើប្រមូល ព័ត៌មាន និង កំណត់ត្រា ផ្សេងៗ ដូចជា ចំណេះដឹងទូទៅ សេដ្ឋកិច្ច កសិកម្ម ប្រវត្តិសាស្រ្ត សុខភាព ។ល។ ពី ប្រភពផ្សេងៗ ដូចជា កាសែត ទស្សនាវដ្តី វិទ្យុ ទូរទស្សន៍ គេហទំព័រ ជាដើម សម្រាប់ មិត្តអ្នកអាន ទាំងអស់ ទុកជាដំណឹង បទពិសោធន៍ ចំណេះដឹងថ្មី ។ ‹‹កំណត់ត្រាសិលា›› គឺជាប្រភេទ បណ្តាល័យ អេឡិកត្រូនិកតូច មួយ ដែល ចារឹក ប្រមូលផ្តុំ រក្សាទុក និង ចែករំលែក ឯកសារ ដែលបាន ចេញផ្សាយ ជាសាធារណៈ ដល់ មិត្តអ្នកអានទូទៅ ទុកជា ចំណេះដឹង ឯកសារយោងសម្រាប់ ការសិក្សា ការងារ និង បុព្វហេតុត្រឹមត្រូវ ។ រាល់ឯកសារ ដកស្រង់ ឬ ចម្លង ពីប្រភពដទៃ នៅលើគេហទំពរ កំណត់ត្រាសិកា គឺ ត្រូវបាន បញ្ជាក់ យ៉ាងច្បាស់ អំពី ប្រភពដើម នៃ ឯកសារ ។
ពិនិត្យឈ្មោះក្នុងបញ្ជីបោះឆ្នោត
កំណត់ត្រាសិលា 
You must be logged in to post a comment.